माहिती आणि जनसंपर्कमधील ‘पोलीस राज' संपले

मुंबई : माहिती आणि जनसंपर्क विभागातील पोलीस राज अखेर संपुष्टात आले आहे. महासंचालक ब्रिजेशसिंग यांना त्यांच्या मूळ खात्यात परत पाठविण्यात आले असून त्यांच्या जागेवर सिधुदुर्गचे जिल्हाधिकारी दिलीप पांढरपट्टे यांची नियुक्ती करण्यात आली आहे. ब्रिजेशसिंग हे माजी मुख्यमंत्री देवेंद्र फडणवीस यांचे निकटवर्तीय समजले जातात. राज्यात भाजपचे सरकार आल्यानंतर देवेंद्र फडणवीस यांनी माहिती आणि जनसंपर्क विभागाच्या महासंचालकपदी आयपीएस अधिकारी नियुक्त करण्याचा प्रयोग देशात प्रथमच केला होता. माहिती आणि जनसंपर्क विभागाचे महासंचालक हे आयपीएस अधिकारी नकोत ते पुर्वी प्रमाणेच आयएएस अधिकारीच असावेत अशी पत्रकार संघटनांची मागणी होती. तसे लेखी पत्र मुख्यमंत्र्यांना दिले गेले होते. मात्र सरकार आपल्या निर्णयावर ठाम राहिले. त्यामुळे पत्रकार, समाज आणि सरकार यांच्यातील दवा म्हणून काम करणार्याप माहिती आणि जनसंपर्कचा संपर्क पत्रकारांशीही राहिला नाही आणि जनतेशी संपर्क साधण्यातही हा विभाग पूर्णतः अपयशी ठरला. पत्रकारांच्या प्रश्नां संदर्भात एक नकारात्मकता विभागात निर्माण झाली होती. छोटी वृत्तपत्रे तर बंदच पडली पाहिजेत अशा पध्दतीनं सारं कामकाज सुरू होतं. महासंचालक पोलीस अधिकारी असल्यानं त्यांच्यातला पोलीस खालपर्यंत झिरपला होता त्यामुळं सर्वांपासूनच हा महत्वाचा विभाग जवळपास तुटला होता. पांढरपट्टे यांच्या नियुक्तीमुळे ती कसर भरून निघण्यास मदत होणार आहे. दिलीप पाढरपट्टे हे अगोदर धुळे आणि सध्या सिंधुदुर्गमध्ये जिल्हाधिकारी म्हणून कार्यरत आहेत. चांगले लेखक,साहित्यिक असलेले पांढरपट्टे गझलकार म्हणून प्रसिध्द आहेत. त्यांच्या गझलेची काही पुस्तकं प्रसिध्द आहेत. त्यांच्या नियुक्तीमुळे माहिती आणि जनसंपर्कमधील वातावरण बदलेल असा विश्वारस आहे. एक चांगला अधिकारी म्हणून पांढरपट्टे ओळखले जातात.